مات الهوى..............................!!!

مات الهوى بيني وبينك من العام..
او صح!! ماكنتي معي في وفاته..

كنتي هناك وضايعه بين الاحلام..
وانا هنا..واعيش سكرة مماته

شفت احتضاره يوم ترميه الايام
باقي معه لآخر نفس من حياته

جاني ذليل ومنكسر كنه اقسام
متشتت النظره وضعت بشتاته

شفته يطيح بخطوته كل ما قام
يصيح فيني مااسمع الا اهاته

طاح بيديني كله جروح والام
بين الضلوع تهزني حشرجاته

يبي يقول وكن في صدره إسهام
والدم ينطف من حشاه لشفاته

غص بكلامه..قام يكتب بالابهام
من دم جرحه فوق صدري وصاته

(لا تامن الخاين ولو حبك اعوام
سهله يخونك واحدٍ خان ذاته..)

طاح وشهق ماعاد باقي به انسام
لفـظ حيـاته.. وانتهت امنيـاته..

غسلته بدمعي ولفيته بخام
قبل ادفنه وادفن معه ذكرياته

عزيت نفسي والحزن يجحم اجحام
وصـبرني الله فـي ليالي عـزاته..

ماانظر وراي ونظرة الحر قدام
ماحدٍ زمانه جا على مشتهاته

ياخاينه..اصحي كفى كذب واوهام
صعبه يحب اللي صفاتك صفاته

انتي حياتك كلها افلام بافلام
اقولها للنصح ماهي شماته

وان كان ترجي واحدٍ مات من عام
هذاك قبره وانبشي في رفاته

اعذروني قصيده واعجبتني واتمنى تعجبكـم